產後飲當歸湯血崩不止切除子宮　陪月：奶奶總是好心做壞事

產後錯飲活血當歸湯，足以要摘除子宮保命。「陪月辛酸。血。淚。屎」版主、70後陪月「2汪」最新帖文，提及一位媽媽分娩後聽從奶奶建議飲當歸湯，結果出現血崩入院，要做手術止血，最終被迫切除子宮。有婦產專科醫生提醒，產後婦女需約6周時間讓子宮收縮復原，所以分娩後首2星期，應避免進食如當歸等行氣活血的中藥。

陪月2汪向TOPick表示，產婦子宮會有很多傷口，需時復原，因當歸有強勁的「行氣活血」之效，若產後即時飲用，會令傷口充血，很容易出現「血崩」的情況。

她指事件中的媽媽在產後第3天就飲用當歸湯，故出現子宮「爆血」，流血不止，醫生最後決定切除子宮，才能止血。

2汪又指，即使是一片當歸，功效已十分顯著，一般中醫會建議產婦在「12朝」後，等傷口埋口才食用當歸，但她認為產婦應在生產後4個星期，並已清除所有惡露後才可飲用。至於孕婦最好不要飲用含當歸的食物及飲料，因或可能會導致流產。

2汪又提醒，很多人以為產後可以食薑醋祛風，但順產的產婦要在7日後；開刀產婦則需待20至30日後才可食用，否則亦有大量出血的可能。

二汪和不少網民都批評事件中的奶奶好心做壞事，有網友直斥：

要多謝大口氣奶奶啦！就咁就冇咗個子宮，連一句道歉都冇！ 這個故事教訓我們要信專業陪月都唔好信生咗N個的奶奶啊！生N個又點！？ 無知就是無知！

有媽媽亦留言，指分娩後聽從大姑奶建議進食木耳湯炒薑飯，差點賠上了性命，

生完二胎當日個大姑拉煲木耳湯炒薑飯比我食，我只係飲佐湯唔夠半個鐘馬上要落產房搶救，差點命仔都冇埋，佢事後還話係我自己身體差，佢話佢d親戚佢個女個個生完就飲都冇事，係得我一個咁！

婦產專科醫生陳世樂表示，一般產後婦女需約6周時間讓體內子宮收縮復原，其間陰道會排出「惡露」的分泌物，

通常產後首2星期會流得多啲，之後會愈來愈少。

他解釋，產後婦女子宮出血有很多原因，包括胎盤遺留、子宮收縮不良、子宮發炎等，亦有產後婦女剛分娩後便進食補身中藥，令出血情況加劇。

陳又說，一般建議產後婦女分娩後首2星期，避免進食如當歸等這類行氣活血的中藥，待子宮收縮恢復正常，傷口開始止血後，才可嘗試進食少量補身的中藥。他又指，產後婦女餵哺母乳亦會幫助身體釋放荷爾蒙，亦有助子宮收縮。

他又表示，因誤食中藥大量出血而被迫切除子宮的情況並不常見，若產後婦女發現子宮出血情況有異，盡快求醫，接受適當的治療。

「陪月辛酸血淚屎」之心軟媽媽原文如下：

心軟媽媽剛剛生咗阿B，第1時間WhatsApp我向報喜。

我：恭喜晒呀~ 好好休息~

心軟媽媽：我想問吓我依家可以食得啲咩嘢? 好肚餓呀!

我：你順產，返上產後病房後，除咗可以食醫院派嘅飯餸，同埋可以飲我幫你炒嘅炒米茶之外，可以叫老公煮我畀你嘅餐單上面，12朝前嘅餸菜或湯水。

心軟媽媽：好，咁我休息吓先。

隔咗1陣，心軟媽媽來電：2汪，我可5（唔）可以飲當歸湯呀? 我奶奶攞咗啲嚟畀我飲。

我：萬萬不可呀! 當歸湯活血，你依家5可以飲呀! 飲咗有可能會流血不止㗎!

心軟媽媽：我奶奶話1（一）生完就可以飲。

我：5（唔）可以呀! 產後起碼第4星期而惡露清晒至可以飲。

心軟媽媽：我奶奶話5（唔）怕喎!

我：係5（唔）怕呀! 飲完有事嗰個係你之嘛!

心軟媽媽：咁我聽你講5（唔）飲住啦。

3日後，心軟媽媽同阿B都出院，我上門開工。

（一）開工未入廚房，已經被大口氣嫲嫲鬧到（一）臉屁!

“我做咗幾十年人，仔女都生個5個，個個都係1（一）生完就係飲當歸湯，都冇話會咩流血不止! 你又話專業陪月，靠嚇呀!"

我：以我專業知識話你聽，當歸湯真係5（唔）可以即刻飲!

大口氣嫲嫲：邊個講呀? 阿娟你5（唔）洗理佢，照飲啦!

我：請我返嚟又5（唔）信我，何必呢!

大口氣嫲嫲：5（唔）好食啲渣，只飲湯就1定冇問題!

5（唔）食9（狗）肉飲9（狗）湯!

我：心軟媽媽真係5（唔）可以飲當歸湯!

心軟媽媽：算啦2汪，我飲小小，應該冇事。

我嘅口頭禪：食1（一）啖砒霜同食1斤砒霜都係1（一）樣，都係會出事㗎嘛!

心軟媽媽：Er。。。

大口氣嫲嫲：講咗5（唔）洗嘥錢請陪月㗎喇! 每日食碗薑醋，飲啲當歸湯，食肉餅食菜芯就得，雞都5（唔）好食咁多呀! 又貴又打毒針!

我冇眼睇，講又講咗，屎5（唔）聽，可以點?

第2日開工，我都追住問心軟媽媽惡露嘅顏色，多少，狀況。

心軟媽媽：2汪，我啲惡露好鮮紅，好似湧住出嚟咁，今朝8點到依家，我換咗4條43CM嗰隻M巾喇!

大檸樂啦!

我：入廁所畀我睇睇啲惡露先。

心軟媽媽1（一）轉身，我已經睇到佢成個籮柚都係血，滲出褲面。

我心急到爆炸：快啲入廁所換巾換褲，要即刻去急症!

心軟媽媽喊咁口：屎伙喇，原來真係5（唔）飲得㗎?

去到急症，醫生睇完心軟媽媽嘅情況，要立即入手術室做止血。可幸嘅係執返條命仔，不過子宮就保5（唔）住了。

2日後係病房撞見大口氣奶奶，佢仲要攞個尾彩：我5（唔）知道我新抱身體咁差，飲啲啲當歸湯啫，就搞成咁。

你屎5（唔）去係你命硬囉!

貼屎(士)：

中藥不可亂食!

當歸通常配合益母草、紅糖可以活血止痛。但係並不適用於懷孕婦女，因可以引致流產，產後婦女都要第四星期後才可以飲。

原文刊於「陪月辛酸。血。淚。屎」Facebook，TOPick獲授權轉載